Tuesday 13 September 2016

Goin tae church

Ah kent Jesus wis guid
Sae Ah felt a wee bit bad 
No likin goin tae church
It hadnae been sich a scunner
When Ah wis wee
And efter the meenister 
Wha Ah liked
Telt the weans a story
We got tae get oot tae Sunday scuil 
But when ye got a wee bit aulder 
Ye hud tae stay fur the fu whack
And a didnae like the claes 
Mair than that, Ah hatit them
Ken hoo yir scuil shirt goes nicen saft 
Efter a while? Weel
Yir Sunday scuil ane disnae 
And a didnae like they Rupert Berr troosers 
Ah'm shair if it wis up tae Jesus
Ye could wear whit ye wantit 
Even jammies, but his faither
God, ye needit tae dress up fur
And Ah got tellt at scuil Ah wis a rotten singer
And mair than hauf the time ye were singin 
Sae whit wis Ah supposed tae dae?
Staun there wi a gowdfish gub
Flappin open and shut?
Jesus micht say
Jist draw a picter
Ye're no bad at that
But probably no God
Ah kindae thocht o God and Jesus
Like Batman and Robin
And Ah aye wantit tae be pals wi Robin
No Batman wha wid be a bit hard goin
Robin wis mair fun but
Ah doobt ye're supposed tae be thinkin 
O Batman and Robin at the hymns 
Sae Ah aye looked at the buik 
Tae see when we were hauf wey through
It wis like goin up a big hill on yir bike
And ye kent the warst wis ower 
But there were some guid anes
Like Onward Christian Soldiers
And ye felt fowk were itchin
Tae march aboot the church
Swingin their airms ahint the meenister
Wha wid be cairryin the cross o Jesus
Goin on before whitever that meant
There wis a fair bit o whitever that meant
At the church
It wis thee and thou and words
That even ma granny's pals
Or auld Mrs Glenmoor at the scuil didnae say
Sae Ah wid look at the clock
And the hats like flyin saucers
And the pipes fur the organ were like rockets
And Ah wis shair a laddie cud rin
Fae the back o the church tae the front
Jumpin frae ane pew tae the next
And Ah imagined daein that
Wi nae troosers, shoutin and bawlin 
And Ah'd never git allowed back
But ma maw and paw wid be affrontit 
And even Jesus widnae find that funny
Sae Ah never did it
And Ah ken Ah've gone on a bit
But that's the wey it wis at church.

No comments:

Post a Comment